بحبــــــــــــــــك

بتعييدي ليه نفس السؤال
مملتيش م الاسئله
يا حبيبتي إيه
موحشتكيش
جاوبيني حلى المسئله

لقلبك
اشد ترحالي
وف الرحلة
أقوم ساند على ضيك
وأشاور وامسك النجمة
اتاري النجمة سرحانه
عيوني بهمس تندها
ولا تردش
وأقوم ضاحك
وأغنى تصخب الغنوه
ف صمت الفجر

بحبك
كلمه ف الموال
بحبك حرف ف سطوري
أكيد هتحسي بللي أتقال
وعين الوعي هتقولك
على دوري
وعلى دورك
دا قلبي زاده ف الرحلة
ضيا نورك

بحبك حتى قلبي كل
وعقلي بعد عقله اختل
عشان خاطرك هعديلك
سياج مفروض من الدنيا
وهرسي جوا بروازك
-يا ناويه ع الوداد ودي-
وودينى
وودينى على سن الخيال ليكى
وأقول الاهه تداويني
و أحس الضحكة
تبتسمي
وأهدهد حلمك النونو
وأشيل قلمك
وألون كل دنيتنا بلون بكره
أكيد احلي
يا قلب الشعر والفكرة
بحبك حب مش محتاج
لقول تانى
بحبك حب مش عايزه
لأي كان
بحبك حب من جوا صميم
إنسان